Бэс ыйын 26 күнүгэр Бэрт-Ууһун нэһилиэгэр СӨ култууратын туйгуннара, Уус-Алдан улууһун култууратын бэтэрээннэрэ ыалдьыттаатылар. Көрсүһүүгэ Бэрт-Ууһун нэһилиэгин А.П.Иванов аатынан норуот айымньытын үлэһиттэрэ уонна култуура бэтэрээнэ, СӨ култууратын туйгуна Александра Андреевна Портнягина ыалдьыттары сахалыы сиэринэн кырылыы кыынньар кымыһынан, арыылаах алаадьынан айах тутан үөрүүлээх түгэҥҥэ көрүстүлэр. Бэрт-Ууһун нэһилиэгин баһылыга Илья Прокопьевич Ильин махтал, э5эрдэ тылын эттэ. Норуот айымньытын киинин уус-уран салайааччыта Анна Николаевна Неустроева кулууп устун экскурция оҥордо, олохтоох библиотека сэбиэдиссэйэ Пелагея Егоровна Парникова туруорбут быыстапкатын кэпсээтэ. Улуус култуура бэтэрээннэрэ кэлбит сыалларын толорон түмсүүлэрин туһунан, инники былааннарын кэпсээтилэр. Улуус култууратын бэтэрээннэрин ааттарыттан сэбиэт бэрэссэдээтэлэ Анна Егоровна Федорова сэбиэт тэриллиэҕиттэн ыытыллыбыт үлэлэри кылгастык билиһиннэрдэ уонна дьонун-сэргэтин итэҕэлин ылан нэһилиэк баһылыгынан талыллыбыт Илья Прокопьевичка ийэлии истиҥ, аҕалыы амарах тыллардаах эҕэрдэ суруктарын, улуус культуратын кэпсиир кинигэни дохсун ытыс тыаһынан туттарда,эдэр киһиэхэ үлэтигэр үрдүк ситиһиилэри баҕарда 👍🏻👏🏻 Анаммыт күн силигин ситэрэн, Бэрт-Ууһун бастыҥ сайылыгар «Балыктаахха» тиийэн айылҕалыын алтыһан, сайыҥҥы сөрүүн күн сибиэһэй салгынынан астына тыынан, Саха сирин биир мааны-эриэккэс көстүүтэ — сардааналаах хонууга, алаас кэрэ көстүүлэригэр дуоһуйа хаартыска5а түстулэр, түмүккэ айыл5а5а итии чэй иһэн, оонньоон-көрүлээн, урукку кэмнэри дуоһуйа кэпсэтэн, сынньанан үөрэ-көтө, инникигэ эрэллээх тар5астылар👍🏻👏🏻