Сэтинньи 7 күнүгэр, Бэрт- Ууһун нэһилиэгэр А. П. Иванов аатынан норуот айымньытын киинигэр Ил, Эйэ, Сомоҕолоһуу күнүн көрсө кулууп дьиэтэ 78 сылын сезонун арыйан «БАРЫ БИИРГЭ, БИИР САНААНАН» бырааһынньыктааҕы кэнсиэр бэрт тэрээһиннээхтик ааста.
Бэрт- Ууһун нэһилиэгин самодеятельность актыыбынай кыттааччылара нэһилиэк дьонугар, ыалдьыттарыгар сэргэх кэнсиэри бэлэхтээтилэр, сонун саҥа ырыалар дьиэрэйдилэр, тэтимнээх үҥкүүлэр буоллулар. Ол курдук ылбаҕай ырыаларынан «Сайылык Далбардара», » Иэйии» ансаамбыллара, эдэр ийэлэр саха төрүт култууратын өрө тутан фольклордаан көрдөрдүлэр. Биирдиилээн ырыаһыттар: Мария Портнягина, Лаврентий Тарскай, Андрей Васильев, Оксана Федорова, Кондратий Герасимов, Эрхаан Слепцов дохсун ытыс тыаһынан доҕуһуоллатан кэрэ куоластарын бэлэхтээтилэр. Хомус эриэккэс тыаһынан Егор Ширяев дьүрүһүттэ. Саҥа тэтимнээх үҥкүүлэри кырачаан оскуола саастаах оҕолорбут Мария Павлова, Долун Иванов, кырачаан оскуола кыргыттарын ансаамбыла, «Дойдууна» үҥкүү бөлөҕө көрдөрдүлэр. Көрдөөх, көрүдьүөс, дьон кутун тутар » Артыыстар» бөлөх сыанка арааһын көрдөрдүлэр, саала иһигэр дьон күлүүтэ сэтэрии көттө.
Кэнсиэри иилээн- саҕалаан ыыттылар Пелагея Парникова, Варвара Иванова.
Кэлбит дьон астына, дуоһуйа көрдүлэр, дохсун ытыс тыаһа тохтоло суох буолла.
Кэнсиэргэ кыттыбыт дьоммутугар Барҕа Махталбытын тиэрдэбит, өрүүтүн бары бииргэ биир санаанан буолуоҕун, бары биир сомоҕо буолуоҕун!
А. П. Иванов аатынан норуот айымньытын киинин коллектива
Для отправки комментария необходимо войти на сайт.