Бэрт- Ууһун нэһилиэгэр Өрөспүүбүлүкэҕэ култуура сыла биллэриллибитинэн, Сыырдаах бөһүөлэгэ 80, Данилов П. Н. 110 сылларынан тэрээһин буолла

Бүгүн, тохсунньу 3️⃣0️⃣ күнүгэр, Бэрт- Ууһун нэһилиэгэр
Саха Өрөспүүбүлүкэтигэр култуура сыла биллэриллибитинэн, Сыырдаах бөһүөлэгэ тэриллибитэ
8️⃣0️⃣, Сыырдаах бөһүөлэгин төрүттээбит
Данилов Петр Николаевич төрөөбүтэ
1️⃣1️⃣0️⃣ сылларынан
«МИН НЭҺИЛИЭГИМ- МИН ДЬЫЛҔАМ» тэрээһин буолла.
Бастакынан, кэлбит ыалдьыттар олохтоох библиотекарь Парникова Пелагея Егоровна туруорбут быыстапкатын сэргээн көрдүлэр. Быыстапкаҕа кулууп дьиэтэ төрүттэммитэ, үлэлээн ааспыт дьоннор, билигин үлэлиир куруһуоктар тиһиллибиттэр уонна Сыырдаах бөһүөлэгин төрүттээбит Данилов Петр Николаевич туһунан материаллары көрөн дьон биһирээтилэр.
Тэрээһиҥҥэ ис- сүрэхтэн тахсар баянынан ырыа ылланна, кэрэ куолас дьиэрэйдэ.
Баянист Петухов Василий Васильевич кэлэн баян алыптаах тыаһын бэлэхтээтэ, дьон сүргэтин көтөхтө. Тэрээһиммитин өссө киэргэтэн биэрдилэр, биһиги ырыаһыт ыалдьыттарбыт Василий Петухов, Михаил Конников уонна олохтоох самодеятельность актыыбынай кыттааччылара: сцена ветерана
Мария Оконешникова, Мария Портнягина, Василий Андросов, Андрей Васильев уонна «Иэйии» вокальнай ансаамбыла. Тэрээһини иилээн- саҕалаан ыытта Василий Черкашин.
Аҕам саастаах дьоммут, үлэ ветераннара хаартыскаҕа түһэн хатаннылар, өйдөбүнньүк буолла. Хаартыскаҕа аҕам саастаахтар түмсүүлэрин салайааччыта Портнягин Максим Максимович кэлбит ыалдьыттары түһэрдэ.
Ол кэнниттэн тэрээһиҥҥэ Бэрт- Ууһун эр дьонун түмсүүтэ, олохтоох дьаһалтата нэһилиэги кытары көрсөн, инники нэһилиэкпит дьылҕатын торумнааһын, санаа атастаһыыта, сүбэлэһии буолла.
Бастатан туран нэһилиэк баһылыга Ильин Илья Прокопьевич тыа хаһаайыстыбатын билиһиннэрдэ, Бэрт- Ууһун нэһилиэгин кинигэтэ сурулла сылдьарын кэпсээтэ. Ханнык да тэрээһиҥҥэ бэйэбит нэһилиэкпит дьоно, биир дойдулаахтарбыт спонсорствоны оҥоро тураллар диэн Махтанан туран эттэ.
«МИН НЭҺИЛИЭГИМ- МИН ДЬЫЛҔАМ» кэпсэтии, санаа атастаһыы, сүбэлэһии бэрт сэргэхтик буолла.
Бары кэлбит нэһилиэкпит олохтоохторугар, санаа атастаһыыга көхтөөхтүк кыттыбыт дьоммутугар Барҕа Махталбытын тиэрдэбит. Бу курдук бары түмсүүлээх, биир сомоҕо буолуоҕун!

А. П. Иванов аатынан норуот айымньытын киинэ