Улуу Кыайыы 80 сыллаах үбүлүөйдээх күнүн Бэрт -Ууһун нэһилиэгэ киэн далааһыннаахтык бэлиэтээтэ.
Ыам ыйын 8 күнүгэр сайыҥҥылыы чаҕылхай ыраас халлааннаах күнүгэр
нэһилиэк олохтоохторо олорор түөлбэлэринэн тахсан ырааһырдыы үлэтигэр күргүөмүнэн субуотунньуктаатылар.
Киэһээ 21 чаастан «Ким да умнуллубат, туох да умнуллубат» Кыайыы болуоссатыгар Улуу Кыайыыны уһансыбыт сэрии, тыыл бэтэрээннэрин, сэрии сылын оҕолорун чиэстээн, ахтан санаан өйдөбүнньүк чүмэчи уота күлүмүрдүү умайда.
Ыам ыйын 9 күнүгэр
Улуу Кыайыы үбүлүөйдээх 80 сыллаах күнүнэн сарсыарда 10 чаастан мустан Кыайыы ырыаларын доҕуһуолунан тэрилтэлэринэн колуонналарга арахсан Россия уонна Кыайыы былааҕын күөрэччи көтөҕөн , тумус тутан парадтаан хаамтыбыт.
Парад холуонната Кыайыы болуоссатыгар кэлбитин кэннэ парад салайааччыта Бэрт-Ууһун нэһилиэгин бочуоттаах олохтооҕо, спорт ветерана Иван Неустроев нэһилиэк аҕа баһылыгар Илья Прокопьевич Ильинҥа дакылааттаан, баһылык нэһилиэгин дьонун Улуу Кыайыы күнүнэн эҕэрдэлээтин кытта парадтааччылар УРАА хаһыынан Уруйдаан хардардылар. Эдэр көлүөнэ ыччаттарбыт Россия, Кыайыы былаахтарын уонна Улуу Кыайыыны уһансыбыт биир дойдулаахтарбытыгар веногу өйдөбүнньүк бэлиэҕэ уурдулар.
Дьэ ол кэнниттэн Улуу Кыайыы 80 сыллаах үбүлүөйдээх күнүн бэлиэтиир миитин үөрүүлээх чааһа нэһилиэк Аҕа баһылыга И. П. Ильин, кырдьаҕастар сэбиэттэрин салайааччыта М. М. Портнягин кыайыыны уһансыбыт, эйэлээх олоҕу түстэспит биир дойдулаахтарбытын сэрии , тыыл , үлэ бэтэрээннэрин , сэрии кэмин оҕолорун, сэрии тулаайахтарын ахтан- санаан, чиэстээн Ил Дархантан уонна улуус администрациятыттан өйдөбүнньүк бэлэхтэри махтал суруктары, олохтоох нэһилиэк тэрилтэлэрин үгэскэ кубулуйбут бэйэ илиитинэн тигиллибит мөһөөччүктэргэ угуллубут бырааһынньыктааҕы бэлэх туттарылынна «Эйэҕэс Эбээлэр» түмсүү салайааччы А. Л. Неустроева көҕүлээһининэн Г. И. Пухов бэчээттээн таһаарбыт Улуу Кыайыы уһансыбыт буруолуу сылдьар брошюраны эҕэрдэлээн туран сэрии тыыл бэтэрээннэрин оҕолоругар туттарылынна. Ону тэҥэ эҕэрдэ үҥкүү, ырыа- тойук, оһуохай тыла дьиэрэйдэ . Үбүлүөйдээх тэрээһини уопсай хаартыскаҕа хатанна, түмүгэр И. С. Портнягин аатынан орто оскуола тэрийбит » Полевой кухня» аһын амсайан тарҕастылар.
Кыайыы үбүлүөйдээх бырааһынньыгар кыайан кэлбэтэх нэһилиэк аҕам саастаахтарыгар «Амарах» түмсүү дьиэлэринэн сылдьан эҕэрдэлээн тыл этэн, ыллаан бэлэх туттарылынна.
Кыайыы күнэ нэһилиэк уус уран самодеятельноһын » Сайылык Далбардара», » Иэйии», » Дойдууна», » Эдэр саас» ансамбллар » Артыыстар» көр-күлүү бөлөҕө, оскуола оҕолоро үҥкүүлээн, ыллаан, тэрилтэ салайааччылара хоһоон ааҕан, Илья Ильин, Вилена Барабанская, Оксана Федорова, Андрей Васильев ылбаҕай ырыаларынан киэргэттилэр, кэнсиэри иилээн-саҕалаан Пелагея Парникова бэрт сэргэхтик ыытта. Кэлбит дьон астына дуоһуйа көрдүлэр.
Нэһилиэкпит дьонун бу ыытыллыбыт Улуу Кыайыы үбүлүөйдээх сылын тэрээһиннэригэр күүс -көмө, сүбэ-ама буолбут дьоммутугар, актыыбынай кыттыыны ылбыт дьоммутугар, тэрилтэлэрбитигэр, нэһилиэкпит олохтоохторугар Барҕа Махтал тылбытын тиэрдэбит.
