Ыам ыйын 15 күнүгэр Бэрт- Ууһун нэһилиэгэр, А. П. Иванов аатынан норуот айымньытын киинигэр Дьиэ- кэргэн күнүгэр аналлаах тэрээһин олус сэргэхтик буолан ааста. Ол курдук «Утум» коллекционердар түмсүүлэрэ салайааччы Бурцева В. А. араас эгэлгэ былыргы малтан саҕалаан аныгы, билиҥҥи олоххо туттар арааһынай маллары аҕалан тэрээһини киэргэттилэр. Оскуола оҕолоро: 3-с кылаастар салайааччы Боярова Т. Д., 5-с кылаастар салайааччы Бурцева Г. В., 6-с кылаастар салайааччы Неустроева Д. И. уонна улахан дьон кэлэн көрөн олус сэргээн иһиттилэр, көрдүлэр.
«Атыылаа, атыылас, атастас» дьаарбаҥка да хаалсыбата, эгэлгэ араас таҥас-сап, ас, рассада эгэлгэтэ буолан дьону интириэһиргэттэ.
Онтон «Оҕо саас оонньуулара«: кылаастааһын, рогатканан ытыы, миэстэ былдьаһыы, » элиэлээх чоппууска» оонньуулар бэрт сэргэхтик, көрдөөхтүк буоллулар. Оскуола оҕолоро, улахан дьон бары көхтөөхтүк кыттан үөрдүлэр-көттүлэр.
Бүтэһигэр кыттыбыт дьоммутугар торт, сок аһатан үөрүүлэрэ өссө үрдээтэ. Бүгүҥҥү дьиэ-кэргэн күнүгэр аналлаах тэрээһиҥҥэ кэлбит дьон бары астынан үөрэн, махтанан тарҕастылар.
Тэрээһиммитигэр кэлбит, бары кыттыбыт дьоммутугар, оҕолорго Барҕа Махтал! Куруутун бу курдук түмсүүлээх буолуоҕун.
Олохтоох библиотека зав. Парникова П. Е. уонна
А. П. Иванов аатынан норуот айымньытын киинин коллектива дир. Бурцева Л. Л.
